بھارت صرف کلبھوشن کے کرتوتوں پر پردہ ڈالنے کے لئے آئی سی جے میں گیا: سرتاج عزیز

اسلام آباد(نیٹ نیوز) مشیر خارجہ سرتاج عزیز نے کہا ہے کہ عالمی عدالت انصاف میں پاکستان کی پوزیشن مستحکم ہے، بھارت کلبھوشن کے کرتوں پر پردہ ڈالنے کے لئے عالمی فورم پر گیا ہے،کہ بھارتی جاسوس کلبھوشن یادیو کی سزا سے متعلق عالمی عدالت انصاف (آئی سی جے) کے عبوری فیصلے کا یہ مطلب نہیں ہے کہ پاکستان کو شکست اور بھارت کی جیت ہوئی ہے۔ عالمی عدالت کے فیصلے میں صرف اتنا کہا گیا کہ جب تک عدالت کلبھوشن یادیو کے کیس کو مکمل طریقے سے نہ سن لے تب تک اسے پھانسی نہ دی جائے۔آئندہ سماعت میں مضبوط قانونی ٹیم کے ہمراہ عالمی عدالت میں پیش ہوں گے۔بھارتی سپریم کورٹ کے سابق جج نے یہ بات تسلیم کی ہے کہ بھارت نے عالمی عدالت میں جاکر غلطی کی ہے، اس حوالے سے پاکستان مسئلہ کشمیر کو عالمی عدالت میں لےکر جائے گا، کشمیر پر پاکستان کا مئوقف تبدیل نہیں ہوگا۔

دفتر خارجہ میں میڈیا بریفنگ سے خطاب کرتے ہوئے مشیر خارجہ سرتاج عزیز نے کہا ہے کہ کلبھوشن عام بھارتی شہری نہیں بلکہ بھارتی نیوی کا افسر ہے۔ کلبھوشن یادیو نے پاکستان میں کی جانے والی دہشت گردوں کی کارروائیوں کا اعتراف کیا ہے اور اسے پاکستان کے آئین اور قانون کے مطابق ہی سزا دی گئی۔ قونصلر رسائی اور اس کے خاندان سے ملاقات کا فیصلہ میرٹ پر ہوگا۔ کلبھوشن تک قونصلر رسائی کے بارے میں کوئی فیصلہ نہیں ہوا، بھارتی میڈیا غلط بیانی سے کام لے رہا ہے۔ ہم اقوام متحدہ کے ممبر ہیں اس لئے عالمی عدالت میں جانا مناسب سمجھا، وکلاءسمیت تمام ماہرین نے یہی مشورہ دیا تھا کہ ہمیں عالمی عدالت میں اپنا موقف بیان کرنا چاہئے، کلبھوشن کے معاملے پر ہماری طرف سے جلدبازی نہیں کی گئی، عالمی عدالت انصاف نے صرف رائے دی ہے کہ ویانا کنونشن کے تحت کلبھوشن تک بھارتی سفارتخانے کو رسائی دینی چاہئے، حکم نہیں دیا۔ پاکستان کو کیس کی تیاری کے لیے صرف پانچ دن ملے اور اس مدت میں ایڈہاک جج بھیجنا ناممکن تھا تاہم پاکستان پاکستان عالمی عدالت میں ایڈہاک جج بھی بھیجے گا جبکہ پاکستان کی لیگل ٹیم کو مزید مضبوط کیا جائے گا۔ بھارت نے پاکستان میں اپنی کارروائیوں کو چھپانے کے لیے عالمی عدالت کا رخ کیا اور وہ انسانی حقوق کی باتیں کر رہا ہے تاہم پاکستان کلبھوشن کے کردار کو نمایاں کرکے بھارتی عزائم دنیا کے سامنے لے آئے گا۔

سرتاج عزیز کا کا مزید کہنا تھا کہ عالمی عدالت کے فیصلے سے کلبھوشن سزا سے سبکدوش نہیں ہوتا، ہم نے کلبھوشن کو آئین اور قانون کے مطابق سزا سنائی، اب پوری تیاری کے ساتھ عالمی عدالت میں دوبارہ جائیں گے، پہلے ہمارے پاس صرف پانچ دن تھے لہٰذا ہم ایڈہاک جج مقرر نہ کر سکے، اس قدر کم عرصے میں اسے کسی جج کو بریف کرنا بھی مشکل تھا۔ ان کا مزید کہنا تھا کہ متفقہ فیصلہ کیا گیا تھا کہ خاور قریشی کو اس کیس میں شامل کیا جائے کیونکہ خاور قریشی نے گذشتہ سال بھی پاکستان کے لیے حیدر آباد فنڈ کیس لڑا تھا جس کے لیے انہیں دفترخارجہ نے ہی بطور وکیل نامزد کیا تھا۔، وہ بہت قابل وکیل ہیں اور انہوں نے بہت اچھی طرح ہمارا مقدمہ لڑا۔

سرتاج عزیز نے میڈیا بریفنگ میں مزید کہا کہ کلبھوشن بھارتی نیوی کا افسر ہے، جعلی پاسپورٹ استعمال کرتا رہا ہے، کونسلر رسائی کے بارے میں عالمی عدالت نے کوئی حکم نہیں دیا، عالمی عدالت نے کہا ہے کہ ہم کیس سنیں گے تب تک پھانسی پر عملدرآمد سے روکا ہے، اصل کیس تو ابھی شروع ہونا ہے، ثابت کریں گے کہ بھارت اپنے سٹیٹ ایکٹرز سے دہشتگردی کرواتا ہے۔ ان کا مزید کہنا تھا کہ جندال کے معاملے کا کلبھوشن سے کوئی تعلق نہیں، جندال کا دورہ ذاتی نوعیت کا تھا، مضبوط بات دس منٹ میں بھی ہو سکتی ہے، یہ تاثر غلط ہے کہ پورے نوے منٹ استعمال نہیں کئے تو اس سے کوئی نقصان ہو گیا۔ انہوں نے یہ بھی کہا کہ کلبھوشن کی سرگرمیاں عالمی عدالت کے سامنے لائیں گے، پاکستانی قانون کے تحت موت کی سزا کو عالمی عدالت نہیں روک سکتی۔

مشیر خارجہ نے مزید کہا کہ بھارت کے سٹیٹ ایکٹرز پاکستان میں دہشتگردی میں ملوث ہیں، بھارت صرف کلبھوشن کے کرتوتوں پر پردہ ڈالنے کیلئے عالمی عدالت گیا، ہم عالمی عدالت نہ جاتے تو بھی یہ ہی فیصلہ آنا تھا۔ انہوں نے یہ بھی بتایا کہ کلبھوشن کیس میں تمام قانونی تقاضے پورے کئے گئے، کوشش ہے کہ کلبھوشن کیس جلد اپنے منطقی انجام کو پہنچے، وزیر اعظم نے کلبھوشن پر پہلا ڈوزیئر 2015ءمیں جنرل اسمبلی میں پیش کیا تھا، دوسرا ڈوزیئر جنوری 2017ءمیں اقوام متحدہ کو بھیجا، کشمیر پر پالیسی تبدیل نہیں ہو گی۔

سرتاج عزیز کا مزید کہنا تھا کہ بھارت کی جیت کا تاثر غلط ہے، بھارتی سپریم کورٹ کے سابق جج نے بھی مانا ہے کہ بھارت کا کلبھوشن کے معاملے کو عالمی عدالت میں لے کر جانا غلطی تھی، اب پاکستان کا کشمیر پر عالمی عدالت میں جانے کا دروازہ کھل گیا ہے، بھارت کی جیت کا تاثر وقتی ہے۔واضح رہے کہ بھارتی سپریم کورٹ کے جج مارکنڈے کاٹجو نے آئی سی جے میں کلبھوشن کا کیس لے جانے کو سنگین غلطی قرار دیتے ہوئے کہا تھا کہ بھارت نے پاکستان کو مسئلہ کشمیر عالمی عدالت میں لے جانے کا موقع دے دیا۔

Post Views: 236