سعودی فرمانروا شاہ سلیمان نے امریکی صدر ڈونلڈ ٹرمپ کو ملک کے اعلیٰ ترین سول اعزاز سے نواز دیا

 

امریکی صدر کے پہلے غیر ملکی دورے کے لیے مسلم ملک سعودی عرب کے انتخاب کے فیصلے کو سفارتی حلقوں میں دلچسپی سے دیکھا جارہا ہے۔اسلام کے تعلق سے ڈونلڈ ٹرمپ کا خطاب کیسا رہے گا؟ اس بابت بھی کافی تجسس پایا جاتا ہے۔سعودی حکومت کی سرکاری ویب سائٹ پرمذکورہ کانفرنس کے اغراض و مقاصد کے حوالے سے کہا گیا ہے کہ امریکی صدر ڈونلڈ ٹرمپ اور اسلامی ممالک کے سربراہان اپنی ملاقات میں دنیا بھر میں دہشت گردی کے بڑھتے ہوئے خدشات پر قابو پانے اور بہتر سیکیورٹی تعلقات کے قیام کو یقینی بنانے کے طریقوں پر غور کریں گے۔امریکی صدر ڈونلڈٹرمپ کی جانب سے اپنے اولین دورے کے لیے سعودی عرب کا انتخاب مسلم ملکوں کے ساتھ امریکا کے تعلقات کو از سر نو مرتب کر سکتا ہے۔ یاد رہے کہ سابق امریکی صدر بارک اوباما کے دور اقتدار کے آخری دنوں میں سعودی امریکی تعلقات میں بظاہر دوری پیدا ہو گئی تھی۔بعض حلقوں کا خیال ہے کہ اس کی ایک وجہ یمن، شام اور ایران کے تعلق سے سعودی عرب کی خارجہ پالیسی ہے۔امریکی صدر ٹرمپ اپنے 2روزہ دورہ سعودی عرب کے دوران سعودی عرب میں اہم امور بشمول دہشت گردی کے خاتمے اور بین الاقوامی تعاون کے ساتھ اس کے مقابلے پر سعودی حکمرانوں سے تبادلہ خیال کریں گے۔صدر ٹرمپ کے دورے کا مقصد خطے میں دہشت گردی سے نمٹنے کے لیے مضبوط شراکت داری اور رابطوں کو قائم کرنا ہے۔صدر ٹرمپ پہلے امریکی صدر ہیں جنہوں نے بطور صدر اپنے پہلے غیر ملکی دورے کے پہلے مرحلے کے لیے سعودی عرب یا کسی مسلمان اکثریت والے ملک کا انتخاب کیا ہے۔صدر ٹرمپ سعودی عرب کے بعد اسرائیل اور ویٹیکن بھی جائیں گے اس کے علاوہ برسلز میں نیٹو اجلاس میں شرکت اور سسلی میں گروپ آف سیون ملکوں کے اجلاس میں بھی شرکت کریں گے۔دوسری طرف بتایا جا رہا ہے کہ سعودی فرمانروا شاہ سلیمان اور امریکی صدر ڈونلڈ ٹرمپ کے درمیان شاہی محل میں باضابطہ مذاکرات شروع ہو گئے ہیں جس کے بعد دونوں ملکوں کے اعلیٰ سرکاری حکام شریک ہیں ۔