کوئٹہ : انڈکس ویب نیوز
اسپیکر بلوچستان اسمبلی راحیلہ حمید خان درانی نے کہا ہے کہ کوئٹہ میں پہلی بار میرے تجویز کردہ فنڈ سے لیڈی ڈفرن ہسپتال کے بعد وومن اینڈ چلڈرن ہسپتال کا قیام تاریخی اہمیت کا حامل ہے۔ جس میں نا صرف خواتین اور بچوں کو صحت کی بہترین سہولیات میسر آسکیں گی بلکہ صحت کے شعبے کی ترقی کی جانب اہم قدم ثابت ہوگا۔
کوئٹہ میں پہلے وومن اینڈ چلڈرن ہسپتال کے افتتاحی تقریب سے خطاب میں اسپیکر بلوچستان اسمبلی محترمہ راحیلہ حمیدخان درانی نے کہا کہ اس ضمن ہسپتال کو فعال بنانے کیلئے محکمہ صحت کو بھرپور اقدامات اٹھانے چاہئیں تاکہ ماں اور بچے کی شرح اموات کو کم کرنے کے ساتھ خواتین اور بچوں کی زندگی کو محفوظ بنایا جاسکے۔ عورتوں اور بچوں پر خصوصی توجہ کے ساتھ لوگوں کو ضروری طبی سہولتوں کی فراہمی کو یقینی بنانے کیلئے تمام دستیاب وسائل کو بروئے کار لایا جارہا ہے۔
ہسپتال تقریبا 3 کروڑ روپے کی لاگت سے تعمیر کیا گیا ہے۔ اسپیکر نے کہا کہ میری خواہش تھی کی ہسپتال کا افتتاح چیف جسٹس بلوچستان ہائیکورٹ کرتے۔ انہوں نے عدالت عالیہ کی طرف سے مذکورہ ہسپتال کی زمین پر ناجائز قبضے کا نوٹس لیتے ہوئے اسے واگزار کرانےکے اقدام کو سراہتے ہوئے کہا کہ عدالت عالیہ نے اس ضمن میں بھرپور ساتھ دیا اور ہسپتال کی تعمیر جو ڈیڑھ سال سے التواء کا شکار تھی آج پایہ تکمیل تک پہنچایا گیا۔ جس پر چیف جسٹس بلوچستان اور عدالت عالیہ کے ججز مبارکباد کے مستحق ہیں۔
اسپیکر نے سیکرٹری صحت کو ہدایت دی کہ ہسپتالوں میں طبی ضروریات کو یقینی بنانے کیلئے عملی اقدامات اٹھائیں۔ بعد ازاں اسپیکر بلوچستان اسمبلی، سیکرٹری صحت، کمشنر کوئٹہ و دیگر حکام نے نو تعمیر شدہ ہسپتال کے مختلف حصوں کا معائنہ بھی کیا۔ اس موقع پر رکن بلوچستان اسمبلی معصومہ حیات، سیکرٹری صحت صالح محمد ناصر، کمشنر کوئٹہ ڈویژن جاوید انور شاہوانی، ایم ایس وومن اینڈ چلڈرن ہسپتال، ایم ایس سول ہسپتال ڈاکٹر امین مندوخیل، ڈاکٹر شیرین خان بھی موجود تھے۔
