کوئٹہ:
ایوان صنعت وتجارت کوئٹہ بلوچستان کے صدر جمعہ خان بادیزئی ،سینئر نائب صدر صلاح الدین خلجی ،حاجی جانان اچکزئی ،سید سرور آغااور سرور احمد پرمشتمل وفد نے ڈائریکٹر ایف آئی اے الطاف حسین آرائیں سے ملاقات کی اور انہیں منی چینجرز اورتفتان بارڈر پر تجارت سے وابستہ افراد کو آمدورفت میں درپیش مشکلات سے آگاہ کیابلکہ انہیں یقین دہانی کرائی کہ ایوان صنعت وتجارت کے ممبران اور عہدیداران قانونی کاروبار کے فروغ کیلئے حکومت اور ملکی اداروں کے ساتھ ہرممکن تعا ون کیلئے تیار ہیں.
انہوں نے بتایاکہ ایوان صنعت وتجارت کے عہدیداران اور ممبران کی ہمیشہ سے کوشش رہی ہے کہ ملک اور صوبے میں اسمگلنگ اور غیر قانونی کاروبار کاخاتمہ ممکن بنایاجاسکے ،وفد نے ڈائریکٹر ایف آئی اے کی توجہ تفتان بارڈر پر صنعت وتجارت اور کاروبار سے وابستہ افراد اورمنی چینجرز کودرپیش مشکلات کی طرف مبذول کرائی اور مطالبہ کیاکہ تجارت سے وابستہ افراد کی آسانی کیلئے تفتان بارڈر پر الگ ڈیسک کے قیام کیلئے متعلقہ حکام کو ہدایات جاری کریں تاکہ کاروباری طبقے کو آمدورفت میں مشکلات کاسامنا نہ کرناپڑے.
انہوں نے بتایاکہ زائرین کے باعث صنعت وتجارت اور کاروبار سے وابستہ افراد کی ایران آمدورفت میں مشکلات پیش آتی ہے بلکہ انہیں طویل انتظار کرنا پڑتاہے ،اس موقع پر ڈائریکٹر ایف آئی اے الطاف حسین آرائیں نے فوری طورپر تفتان میں ایف آئی اے حکام کو ہدایات جاری کیں کہ وہ صنعت وتجارت سے وابستہ افراد کی آمدورفت کو سہل بنانے کیلئے ڈیسک کا قیام فوری طورپر عمل میں لائیں تاکہ انہیں آمدورفت میں مشکلات کاسامنا نہ کرناپڑے ،انہوں نے منی چینجرز اور دیگر کے مشکلات کیلئے بھی ہرممکن تعاون کی یقین دہانی کرائی جس پر ایوان صنعت وتجارت کے وفد نے ڈائریکٹر ایف آئی اے کا شکریہ اداکیا اس سے قبل ڈائریکٹرایف آئی اے الطاف حسین آرائیں نے چیمبرآف کامرس کے وفد میں شامل عہدیداران کا استقبال کیا اور انہیں خوش آمدید کہا۔
