کوئٹہ;
سینیٹر ثمینہ ممتاززہری نے گزشتہ روز ضلع بولان کی تحصیل میں ڈھاڈر کے قریب بلوچستان کانسٹبلری کی گاڑی پر خود کش حملے میںبلوچستان کانسٹبلری کے جوانوں اور عام شہریوں کی شہادت پر گہرے دکھ اور رنج و غم کا اظہار کیا ہے ۔ انہوں نے اپنے مذمتی بیان میں واقعہ کی شدید الفاظ میں مذمت کرتے ہوئے واقعہ کو انتہائی بزدلانہ فعل قرار دیا اور کہا کہ وطن کی حفاظت جیسے فرض پر مامورسیکیورٹی اہلکاروں پر دہشت گردوں کا بزدلانہ حملہ کھلی دہشت گردی ہے۔ دہشت گرد اپنی بزدلانہ کارروائیوں سے بلوچستان کے امن کو سبوتاژ کرنا چاہتے ہیں۔صوبے کی عوام دہشت گردی کے خلاف اس جنگ میں اپنی فوج اور دیگر سیکیورٹی فورسز کے شانہ بشانہ کھڑی ہے۔
سینیٹر ثمینہ ممتاز زہری نے کہا ہے کہ دہشت گردی کے بڑھتے واقعات تشویشناک ہیںاور ان کارروائیوں کے تانے بانے بھارت سے ملتے ہیں جو کچھ ناعاقبت اندیش لوگوں کو استعمال کر کے اس طرح کی بزدلانہ کارروائیاں کر رہا ہے اور نہیں چاہتا کہ پاکستان میں امن قائم ہولیکن ُاس کا یہ خواب کبھی شرمندہ تعبیر نہیں ہوگا ۔سینیٹر ثمینہ ممتاز زہری نے کہا کہ یہ واقعہ امن و امان کی فضا ءکو سبوتاژ کرنے کی مذموم کارروائی ہے اور دھماکے کے ذمہ دار قانون کی گرفت سے نہیں بچ پائیں گے۔سینیٹر ثمینہ ممتاز زہری نے کہا کہ دہشت گرد عناصر ایک سوچی سمجھی سازش کے تحت ملک میں دہشتگردی کی فضاءقائم کرنے کی کوشش کر رہے ہیں جسے کسی صورت کامیاب نہیں ہونے دیا جائے گا ۔
