کوئٹہ
اے اے ایم نیشن کیئر فاﺅنڈیشن کے بانی و چیئرمین عبداللہ امانت محمدی کا کہنا تھا کہ پاکستان میں غربت بڑھنے کی بنیادی وجہ سودپر مبنی نظام ہے ،لہٰذازکوٰة کے نظام کو فعال بنا کرہی پاکستانی معاشرے سے غربت ختم کی جا سکتی ہے۔ان خیالا ت کا اظہار انہوں نے خدمت خلق کے مشن پر گامزن فلاحی تنظیم اے اے ایم نیشن کیئر فاﺅنڈیشن کی جانب سے معاشرے کے نظر انداز طبقے میں راشن بیگز تقسیم کرنے کی تقریب سے خطاب کرتے ہوئے کیا۔
اے اے ایم نیشن کیئر فاﺅنڈیشن کے بانی عبداللہ امانت محمدی کا کہنا تھا کہ ایساسفید پوش طبقہ جو کسی کے سامنے ہاتھ نہیں پھیلا سکتا ان لوگوں کی عزت نفس کو مجروح کیے بغیر راشن بیگز ان کے گھر کی دہلیز پر پہنچائے جاتے ہیں۔عبداللہ امانت محمدی کا کہنا تھا کہ ہنرمندی کا راستہ ہی نوجوان نسل کو خوشحالی کی منزل تک پہنچائے گا،اے اے ایم نیشن کیئر فاﺅنڈیشن کا بنیادی مقصد پسماندہ علاقوں سے تعلق رکھنے والے نوجوانوں کو انٹرنیٹ سے کمائی کا ہنر فری میں سکھانے کی ٹریننگ دینا ہے جن سے استفادہ کر کے نوجوان اپنی فیملی کو سپورٹ کرنے کے قابل بن سکتے ہیں۔
ان کا کہنا تھا کہ پاکستان کا مستقبل ٹیکنیکل ایجو کیشن کے فروغ سے وابستہ ہے نوجوان نسل کو فنی علوم سے آراستہ کرکے نہ صرف بے روزگاری کے مسئلے پر قابو پایا جاسکتا ہے بلکہ ملک کو ترقی و خوشحالی کی راہ پر بھی گامزن کیا جاسکتا ہے،دنیا میں انہی قوموں نے تیزی سے ترقی کی منازل طے کی ہیں جنہوں نے اپنی نوجوان نسل کو عہدِ حاضر کی ضروریات سے ہم آہنگ کرتے ہوئے جدید علوم سے آراستہ کیا،پاکستان کی بڑی آبادی نوجوانوں پر مشتمل ہے انہیں جدید علوم، انفارمیشن ٹیکنالوجی اور مارکیٹ کی ضروریات کے مطابق مختلف فنون و شعبہ جات میں تربیت دے کر تیز رفتار ترقی اور خوشحالی کا خواب شرمندہ تعبیر کیا جاسکتا ہے۔
