ریاض (مانیٹرنگ ڈیسک) سعودی عرب ،اسرائیل اور پھر ویٹی کن سٹی کے دورے کے ساتھ اپنے پہلے غیر ملکی دورے کا آغاز کرتے ہوئے سعودی عرب پہنچنے والے امریکی صدر ڈونالڈ ٹرمپکو سعودی فرمانروا شاہ سلیمان بن عبد اللہ نے ملک کے اعلیٰ ترین سول اعزاز سے نواز دیا ہے ،شاہ سلیمان کی جانب سے شاہی محل میں امریکی صدر اور ان کے وفد کے اعزاز میں ظہرانہ ،جبکہ امریکہ اور سعودی عرب کے حکمرانوں کے درمیان باضابطہ مذاکرات شاہی محل میں جاری ہیں۔
تفصیلات کے مطابق امریکی صدر ڈونلڈ ٹرمپ اپنے پہلے غیر ملکی دورے پر اپنی اہلیہ ،بیٹی ،داماد اور اعلیٰ امریکی حکام کے ہمراہ ریاض کے شاہ خالد انٹرنیشنل ائیر پورٹ پر پہنچے تو سعودی فرمانروا شاہ سلیمان اور اعلی حکام نے ائیر پورٹ پر ان کا پر تپاک اور شاندار استقبال کیا ،بعد ازاں شاہی محل میں سعودی فرمانروا کے ساتھ امریکی صدر کی رسمی ملاقات ہوئی جبکہ بعد ازاں امریکی صدر کے اعزاز میں شاہی محل میں ظہرانہ بھی دیا گیا اور امریکی صدر کو سعودی عرب کے اعلیٰ ترین سول اعزاز سے نوازا گیا ،امریکی صدر کل عالمی اسلامی سربراہی کانفرنس سے خطاب کریں گے ۔
انتہاپسندی کے بڑھتے ہوئے خدشات کے پیش نظر سیکیورٹی پارٹنرشپ تشکیل دینے کے لیے منعقد ہونے والی اس پہلی امریکا عرب اسلامی کانفرنس میں کل 54 اسلامی ممالک کے سربراہان شرکت کررہے ہیں،پاکستانی وزیر اعظم میاں محمد نواز شریف بھی کانفرنس میں شرکت کے لئے کل سعودی عرب روانہ ہوں گے ۔امریکی صدر ڈونالڈ ٹرمپ کا خصوصی طیارہ ’ایئرفورس ون‘ جب ریاض کے شاہ خالد انٹر نیشنل ایئرپورٹ پر اترا توان کے استقبال کے لیے سعودی شاہ سلمان بن عبدالعزیز خود بھی ایئرپورٹ پر موجود تھے جبکہ ٹرمپ اور ان کے وفد کے لیے ریڈ کارپٹ استقبال کی تیاریاں کی گئی تھیں،اس موقع پر سیکیورٹی کے انتہائی سخت انتظامات کئے گئے جبکہ سعودی جنگی طیارے بھی فضا میں پرواز کرتے رہے۔ اس دورے میں میلانیا ٹرمپ نیکسی دوپٹے یا اسکارف کے بغیر سیاہ رنگ کا لباس پہنے امریکی صدر کے ہمراہ ریاض پہنچیں ،ڈونلڈ ٹرمپ کے اس پہلے غیر ملکی دورے میں ان کی اہلیہ کے علاوہ ان کی بیٹی اور صدارتی مشیر ایوانکا ٹرمپ اور داماد جیریڈ کوشنر بھی شامل وفد ہیں،دورے میں امریکی وزیرخارجہ ریکس ٹیلرسن، قومی سلامتی کے مشیر ہربرٹ ریمنڈ میکس ماسٹر اور دیگر بھی شامل ہیں۔
