کوئٹہ:
پاکستان میں متعین ایران کے سفیر مہدی ہنر دوست نے کہا ہے کہ پاک ایران دوطرفہ تجارتی حجم میں گزشتہ چار ماہ کے دوران 46 فیصد اضافہ ہواہے بلکہ نئی حکومت کے ساتھ دوطرفہ تجارتی اہداف کے حصول، بنکنگ چینلز کی و دیگر سے متعلق امور پر بات چیت ہوئی ہے، ایرانی حکام اور عوام عالمی سامراج کی تمام تر سازشوں اور مشکلات کے باوجود بھی انقلاب ایران کے بنیادی اصولوں پر کاربند ہے ان خیالات کا اظہار انہوں نے ایوان صنعت و تجارت کوئٹہ بلوچستان کی جانب سے اپنے اعزاز میں دئیے گئے عشائیہ کے موقع پر خطاب کرتے ہوئے کیا۔
اس سے قبل چیمبر آف کامرس کے پیٹرن ان چیف غلام فاروق خان خلجی، صدر چیمبر آف کامرس جمعہ خان بادیزئی، سنئیر نائب صدر صلاح الدین خلجی،پاک ایران جوائنٹ چیمبر آف کامرس کے صدر ولی محمد نورزئی، فیڈریشن آف کامرس کے حاجی عبداللہ اچکزئی، سابق سنئیر نائب صدر محمد ایوب خلجی، حاجی فوجان بڑیچ و دیگر نے ایرانی سفیر اور ان کے وفد میں شامل افراد کا استقبال کیا۔اس سے قبل چیمبر آف کامرس کے سابق سنئیر نائب صدر حاجی ایوب خلجی نے چیمبر آف کامرس کی سالانہ کارکردگی سے متعلق اظہار خیال کیااور کہا کہ ایوان صنعت و تجارت کی روز اول سے کو شش رہی ہے کہ دونوں برادر اسلامی ممالک کے ساتھ دوطرفہ تجارت کو روز افزوں ترقی ملے بلکہ ہماری کوشش ہو گی کہ 14 اور 15 اکتوبر کو جوائنٹ ٹریڈ میٹنگ میں دوطرفہ تجارتی مسائل کا حل نکالا جا سکے،
انہوں نے چین کے طرز پر ایران کے ساتھ ایف ٹی اے آزاد تجارتی معاہدہ کی بھی تجویز دی ۔عشائیہ سے خطاب کرتے ہوئے ایران کے پاکستان میں متعین سفیر مہدی ہنر دوست نے کہا کہ انہیں بلوچستان اور کوئٹہ آمد پر انتہائی خوشی ہوئی ہے آج کا یہ پروگرام اور ملاقات دوستی کے آغاز کا دن ہے ہم آج ایسے نکات کو بیان کریں گے جو قابل بحث و عمل ہو۔انہوں نے کہا کہ اسلامی دنیا میں موجودہ حالات اور ناخوشگوار صورتحال کے پیچھے عالمی سامراج کا ہاتھ ہے اس وقت ایران عالمی سامراج کے مقابلے کی قیمت ادا کر رہا ہے، آزادی اور استقلال کی قیمت ادا کرنا پڑتی ہے عالمی سامراج مختلف حوالوں سے ہم پر حملہ آور ہے انہوں نے کہا کہ دشمنوں نے چار دہائیوں سے ایران کے خلاف ہر طرح کی سازشیں کی ہے جن میں عراق کے ساتھ 8 سالہ جنگ، اقتصادی پابندیاں اور دہشتگردی کے واقعات شامل ہیں، لیکن اس کے باوجود بھی ایران قوم اور اس کے قائدین اسلامی انقلاب ایران کے بنیادی اصولوں پر سختی سے کاربند ہے،
انہوں نے کہا کہ ہم تیسری قوت کے منتظر نہیں بلکہ ایران اپنے معاملات اپنے ہمسائیوں کے ساتھ مل بہتر بنائیں گے انہوں نے کہا کہ خطے کی موجودہ حالات اور ہمیں درپیش مشکلات کا سبب عالمی سامراج ہے انہوں نے کہا کہ پاکستان اور ایران ہر طرح کے حا لات اور مشکلات میں ہمیشہ ساتھ رہے ہیں جس کا واضح مثال دو طرفہ تجارت کے حجم میں 130 ارب ڈالر کا اضافہ ہے، گزشتہ چار ماہ کے دوران دوطر فہ تجارت میں 46 فیصد اضافہ ہوا ہے بلکہ دوطرفہ تعاون کے ذریعے اس میں مزید بہتری لائی جائے گی، انہوں نے کہا کہ ہماری پاکستان کی نئی حکومتی حکام کے ساتھ تجارت سمیت مخلتف امور سے متعلق بات چیت اور ملاقاتیں کیں ہیں انہوں نے کہا کہ ہم پاکستان کے ساتھ خشکی کے ذریعے، سمندری راستے، اور فضائی راستوں سے تجارت کا فروغ چاہتے ہیں تاکہ دونوں ممالک کے دوطرفہ تجارتی اہداف کو حاصل کیا جا سکے، انہوں نے امید ظاہر کی کہ ان کے اگلے دورہ بلوچستان کے موقع پر موجودہ مسائل حل ہو گئے ہوں گے تقریب سے ایرانی قونصل جنرل آغا رفیعی نے کہا کہ میں چیمبر کے نومنتخب صدر جمعہ خان بادیزئی ۔پیٹرن ان چیف غلام فاروق خان و دیگر کا پروگرام کے انعقاد پر شکر گزار ہوں بلکہ امید سے ہوں کہ دوطرفہ تجارتی مسائل دوطرفی گفت و شنید سے حل ہوں گے انہوں نے کہا کہ ایرانی سفیر کا تجربہ بھی اس سلسلے میں انتہائی اہمیت کی حامل ہیں۔
رپورٹ: کوئٹہ انڈکس/ سید کلیم اللہ شاہ
